Casper de Vries vermaak ons al vir die laaste 21 jaar vanaf die verhoog en televisie. Ter viering van hierdie suksesvolle, langdurende loopbaan bied hy met trots sy nuutste vertoning aan: Mondig.

In hierdie 2 en ‘n half-uur lange vertoning kan jy Casper op sy beste sien - verwag vlymskerp kommentaar oor aktuele onderwerpe aangevul deur terugblikke op Casper se lewe en loopbaan, wat met behulp van goeie multimedia (musiek, fotografie, videos en 'props') 'n veelkleurige, interessante reis deur 21 jaar van kwinkslae en satire word.

Al die gunsteling karakters is daar - die agentaggentaggentag-jarige Oom Kallie Marie, bekkige Patience, kamp Montelle, stomme Blertsie, kommin maar komiese Hanno Gelderblom asook Casper se ou handlanger Greetje Appelmoes en meer onlangse toevoegings tot die 'cast' maak almal 'n draai. Hulle is soos te verwagte nie op hul bekke geval nie. Elkeen het 'n stuiwer by te dra tot die kollektiewe beurs, en danksy moderne tegnologie kan Casper heel interaktief en op vermaaklike wyse met die uitgesproke karakters omgaan.

'Mondig' mag dalk nie vir sensitiewe siele bedoel wees nie, maar Casper se aanhangers sal lag dat die trane rol.